فى ناس كتير أعرفهم محددين أهدافهم بوضوح جدآ وعارفين هما عايزين إيه بالظبط 
وبرغم أنهم محددين الأهداف بدقة كبيرة لكنهم مع الأسف مش بيعرفوا يحققوا أى حاجه من الاهداف دي !!!!
ومن خلال لقاءات كتيرة معاهم إكتشفت السبب إللى بيخليهم فعلا مش بيوصلوا لأى نتيجه ملموسه تجاه أهدافهم، ولكن......قبل ما أقولكم على السبب ده خليني اسألك سؤال
هل ينفع تأكل وأنت نايم
الحقيقة محدش ممكن يأكل وهو نايم إلا لو كان بياكل رز مع الملائك
زي ما كانوا بيقولوا لنا زمان لما بيكون فى واحد متعمق جدآ فى النوم.
زي ما كانوا بيقولوا لنا زمان لما بيكون فى واحد متعمق جدآ فى النوم.والحقيقة إن مينفعش حد يأكل وهو نايم لأن الأكل شئ مهم والنوم كمان شئ مهم علشان كده مينفعش تعمل أكثر من حاجه مهمة في نفس الوقت لأن ده في الغالب سوف يؤثر سلبآ على جودة المخرجات.
بصراحه السؤال ده بيجسد الأسباب إللى بتخلى الناس مش بتحقق حاجه من أهدافها برغم معرفتهم الجيدة بالأهداف دي، والسبب هو
" غياب التركيز وعدم ترتيب الأولويات"
مهم إنك تبقي عارف إنت عايز إيه ولكن الأهم إنك تحقق ولو جزء بسيط من اللى أنت عايزه.مهم جدا إنك تركز على هدف واحد بس علشان تقدر توصل لباقي الأهداف.للأسف الشديد غياب التركيز على هدف واحد وتشتيت ذهنك في أكثر من هدف بيخليك مع الأسف مش بتوصل لأى حاجه، لأن الموضوع بمنتهي البساطه بيعتمد على التركيز.
ولأن أهدافك كلها مهمه مينفعش تعمل حاجتين مهمين فى نفس الوقت، لازم تركز على حاجه مهمه ويتم تحقيقها، وبعد كده تبدأ فى الحاجه التانية وهكذا
فكرة إنك ترتب أهدافك حسب الأولوية بتساعدك كتير إنك تبدأ فى عملية التركيز على كل هدف على حدا، وده لوحده كفيل إنه يخليك تحقق الهدف ده، لان أهم جانب فى التركيز إنك تركز ذهنك على شئ واحد.
وبمجرد إنك تركز على هدف واحد هتلاقي الهدف ده عامل زى المغناطيس هيشدك له وهيشد كل مواردك وقدراتك وإمكانياتك فى سبيل تحقيقه.
وكل ما ركزت جهودك وطاقتك أكتر هيتولد جواك قوة أكبر هتساعدك كتير فى تحقيق باقي أهدافك وهترفع من مستواك ومن مستوى أداءك فى التعامل مع باقية الاهداف.
التركيز وإعادة ترتيب أهدافك حسب الأولوية وإنك تركز على شئ واحد مهم بالنسبة لك دلوقتي مش بعدين هي الوصفة السحرية للوصول لأهدافك .
علشان كده لو أنت محدد أهدافك وعارفها كويس ولكن مش بتوصل لها ده فى الغالب بيكون بسبب عدم تركيزك على هدف واحد فقط وبيكون بسبب إنك عايز تحقق كل الاهداف دي دفعه واحدة .
وافتكر إن تركيزك على هدف واحد وإنجازه هو السبيل الوحيد إللى هيخلق جواك الحافز علشان تنجز وتحقق باقي الاهداف وتعرف الخطوات السليمة تجاه بلوغ أهدافك.
علشان كده مهم إنك تبقي عارف أنت عايز إيه ولكن.....ده لوحده مش كفاية إنك تحقق حاجه من إللى أنت عايزها
أتمنى أكون قدرت أوصل لك لو جزء صغير من معلومة ويسعدني الرد على إستفساراتك وأسئلتك في التعليقات
تحياتى
كريم محسن
=================================================
احنا موجودين في كل المنصات عشان نوصلكم المعلومة اللي تفديكم في شغلكم او الابتسامة اللي بتساعدنا في مواجهة الظروف الصعبة او يارب يجعلنا سبب في انك تلاقي وظيفة
مستنينكم
***********************
***********************
0 تعليقات